Қазақстанда халықтың өмір сүру сапасының деңгейін бағалауға мүмкіндік беретін стандарттар қабылданды
2022 жылы қабылданған ISO 37120 сериясының ұлттық стандарттары халықтың өмір сүру сапасының 120-дан астам көрсеткіштерін және оларды анықтау әдіснамасын белгілейді.
Анықтама:
ҚР СТ ISO 37120-2022 «Қалалар мен қауымдастықтардың тұрақты дамуы –қалалық қызметтер мен өмір сапасының көрсеткіштері».
ҚР СТ ISO 37122-2022 «Тұрақты қалалар мен қауымдастықтар. Ақылды қалалар үшін көрсеткіштер»;
ҚР СТ ISO 37123-2022 «Тұрақты қалалар мен қауымдастықтар. Тіршілікке төзімді қалалар үшін көрсеткіштер».
Стандарттар елді мекеннің қызметтері мен өмір сүру сапасына бағытталған және келесі салаларды қамтиды: экономика, білім беру, энергетика, экология, қаржы, өрт қауіпсіздігі және төтенше жағдайларда әрекет ету, басқару, денсаулық, демалыс, қонақжайлылық, қатты қалдықтарды қайта өңдеу, телекоммуникация және инновация, көлік, қаланың жоспары, ағынды сулар, сумен жабдықтау және санитария.
Стандарттардың әдістемесі елді мекендердегі әртүрлі сапалық көрсеткіштер бойынша өмір сүру деңгейін анықтауға мүмкіндік береді: жастар арасындағы жұмыссыздық деңгейі, бастауыш және орта мектептердегі оқушылар мен мұғалімдердің арақатынасы, ауруханалардағы төсек-орындардың саны, тұрғындардың санына дәрігерлер саны, қала маңында тұратын және жұмысқа жеке автокөлік емес, басқа көлік түрін пайдаланатын тұрғындардың үлесі және т. б.
Стандарттың көрсеткіштері өмір сүру сапасы мен экологиялық тұрақтылықты жақсарту мақсатында қызметтерді және олардың динамикасын бағалауға көмектеседі. Бірыңғай тәсіл қалаларды бір-бірімен еш қиындықсыз салыстыруға мүмкіндік береді.
ҚазСтандартта Алматы облысының, Абай, Жетісу, Ұлытау облыстарының аумақтарында ҚР СТ ISO 37120 стандартын пилоттық енгізу жөніндегі жұмыс топтары құрылғанын атап өтеміз, олардың құрамына жергілікті атқарушы органдардың, Ұлттық экономика министрлігінің, Цифрлық даму, инновациялар және аэроғарыш өнеркәсібі министрлігінің өкілдері және т.б. кірді.