1 Шілде 2026
Алматы қаласы және Алматы облысы бойынша «ҚазСтандарт» РМК филиалының өкілдері иондаушы сәулелену саласындағы өлшеу құралдарын жеткізуші қазақстандық жетекші компаниялардың бірі — «НПП Гамма» ЖШС кеңсесіне барды.
Кездесу барысында тараптар филиалдың метрологиялық базасын дамытуға қажетті эталондық жабдықтарды жеткізу мәселелерін қарастырды. Сондай-ақ мемлекеттік эталондарды, арнайы өлшеу құралдарын және иондаушы сәулеленудің тексеру көздерін сатып алу мәселелері талқыланды. Бұл жабдық дозиметрлерді, радиометрлерді, дозкалибраторларды және басқа да өлшеу құралдарын салыстырып тексеру мен калибрлеуді жүргізуге мүмкіндік береді.
Кездесуге қатысушылар рентген және гамма-сәулеленуді, сондай-ақ радон, торон және нейтрондық сәулеленуді өлшеуге арналған эталондарды дамыту мәселелеріне ерекше назар аударды. Бұл бағыттар атом өнеркәсібі, медицина және радиациялық бақылау салалары үшін маңызды болып табылады.
— Біздің мақсатымыз — иондаушы сәулелену саласында жеке эталон базаны қамтамасыз ету. Бұл Қазақстан үшін стратегиялық тұрғыдан маңызы бар қадам. Жобаны іске асыру ел ішіндегі өлшеулердің метрологиялық қадағалануын қамтамасыз етуге, отандық зертханалардың мүмкіндіктерін кеңейтуге және ұлттық қауіпсіздік деңгейін арттыруға мүмкіндік береді. Біздің ынтымақтастығымыз аталған міндетті тиімді іске асыруға мүмкіндік беретін маңызды қадам болады деп сенеміз», — деді РМК филиалының басшысы Руслан Беккожин.
«НПП Гамма» ЖШС ұзақ мерзімді ынтымақтастыққа дайын екенін растады. Кездесу қорытындысы бойынша тараптар иондаушы сәулелену саласындағы метрологиялық қамтамасыз етуді дамыту бойынша бірлескен жұмысты жалғастыруға келісті.
Ұлттық эталондық базаны құру атом өнеркәсібінде, медицинада, өнеркәсіпте және радиациялық бақылауда қолданылатын өлшеу құралдарын салыстырып тексеру мен калибрлеуді тікелей Қазақстан аумағында жүргізуге мүмкіндік береді. Бұл өлшеулердің мемлекеттік эталондарға метрологиялық қадағалануын қамтамасыз етеді, шетелдік метрологиялық орталықтарға жүгіну қажеттілігін азайтады, жұмыстарды орындау мерзімі мен шығындарын қысқартады, сондай-ақ радиациялық қауіпсіздік деңгейі мен елдің технологиялық тәуелсіздігін арттырады.
Иондаушы сәулелену саласындағы өлшеулердің метрологиялық қадағалануын қамтамасыз ету бойынша жұмыстар тиісті эталондық базаны құру перспективаларын ескере отырып, жұмыстар жүргізілуде.
