13 Шілде 2026
Қырғызстанда ТМД Стандарттау, метрология және сертификаттау жөніндегі мемлекетаралық кеңесінің 69-шы отырысы өтті. Іс-шараға Қазақстан делегациясын ҚР Сауда және интеграция министрлігі Техникалық реттеу және метрология комитетінің төрағасы Жанна Есенбекова басқарды.
Отырыcқа ТМД елдерінің стандарттау, метрология, сәйкестікті бағалау және аккредиттеу жөніндегі ұлттық органдарының басшылары мен өкілдері қатысты. Сондай-ақ іс-шараға ТМД Атқарушы комитетінің, МАК Стандарттар бюросының және халықаралық мамандандырылған ұйымдардың өкілдері қатысты.
Жұмыстың алғашқы күні «Сапа белгісі бар достастық» атауымен II Халықаралық конференция өтті. Қатысушылар өңірлік сапа инфрақұрылымын дамыту, цифрландыру, ақылды стандарттарды енгізу және халал индустриясын дамытудың перспективаларын талқылады.
Іс-шаралар аясында өнімдер мен көрсетілетін қызметтердің сапасын арттыру саласындағы жетістіктері үшін 2025 жылғы ТМД сыйлығы лауреаттарын марапаттау рәсімі өтті. Бұдан бөлек 2027 жылғы ТМД сыйлығына арналған 11-ші конкурсқа старт беріліп, оны өткізу жоспары бекітілді.
«ТМД-ның 2026 жылғы үздік стандарттаушысы» конкурсында «ҚазСтандарт» РМК өкілдері Елена Кулешова мен Гүлмайда Кәрімова жоғары марапаттарына ие болды.
Пленарлық отырыста қатысушылар техникалық реттеу, стандарттау, метрология, сәйкестікті бағалау және аккредиттеу салаларына қатысты 30-дан астам мәселені қарастырды. Сондай-ақ ТМД Стандарттау, метрология және сертификаттау жөніндегі мемлекетаралық кеңесін (МАК) 2030 жылға дейін дамыту стратегиясын іске асыруға, сондай-ақ стандарттау, метрология және сертификаттау саласында келісілген саясат жүргізу туралы келісімге енгізілетін өзгерістер жобасына ерекше назар аударылды.
ТМД кеңістігінде халал-сертификаттау жүйесін дамыту мәселесіне ерекше назар аударылды. Жанна Есенбекова Халал өнімдері мен көрсетілетін қызметтерді сертификаттау бойынша бірыңғай тәсілдерді қалыптастыру және қатысушы мемлекеттер арасындағы ынтымақтастықты дамыту мақсатында ТМД Стандарттау, метрология және сертификаттау жөніндегі мемлекетаралық кеңесі аясында жұмыс тобын құруды ұсынды.
Метрология саласында қатысушылар «Өлшем бірлігін қамтамасыз ету туралы» модельдік заң жобасын қарастырып, мемлекетаралық бағдарламалардың жүзеге асырылу барысын талқылады.
Отырыс қорытындысы бойынша тараптар ғылыми-техникалық комиссиялардың 2026 жылдың екінші жартыжылдығына арналған жұмыс жоспарларын бекітіп, қорытынды хаттамаға қол қойды.
