1 Қазан 2026
30 қыркүйекте мемлекеттік органдардың, металлургиялық кәсіпорындардың және сараптамалық қауымдастықтың өкілдері Қазақстанның металлургия саласында қолданылатын жаңа ұлттық стандарттарды талқылады.
Дөңгелек үстелге Қазатомөнеркәсіп, Қазақмыс, Қазцинк, Тау-Кен Алтын, STANDARD STEEL KZ, Declare Group және басқа да ұйымдардың өкілдері қатысты. Екі ұлттық стандартты талқылауға баса назар аударылды.
ҚР СТ 4021-2025 «Сирек элементтер мен түсті металдар. Терминдер мен анықтамалар» ұлттық стандарты сирек элементтер мен түсті металдарды алу, өндіру және айналымы саласындағы бірыңғай терминологияны белгілейді.
Құжат сонымен қатар оларды металлургиялық сынықтар мен қалдықтардан алу мәселелерін қамтиды.
Талқылаудың маңызды бағыты металлургия саласындағы ҚР СТ EN 10247-2025 «Эталондық кескіндерді пайдаланып, болаттағы металл емес қосындылардың мөлшерін металлографиялық анықтау» стандартын іс жүзінде қолдану болды.
Стандарт болаттың сапасын визуалды бағалаудан эталондық кескіндерді қолдана отырып, металл емес қосындыларды бірыңғай металлографиялық бағалауға көшуге мүмкіндік береді.
Металл өнімдерін өндірушілер мен тұтынушылар үшін бұл болаттың сапасын бақылау кезінде өте маңызды, өйткені металл емес қосындылардың сипаты, саны мен мөлшері дайын илем пен бұйымдардың пайдалану қасиеттеріне әсер етуі мүмкін.
Бағалаудың бірыңғай әдісін қолдану кәсіпорындар, сынақ зертханалары және тапсырыс берушілер арасындағы бақылау нәтижелерінің салыстырмалылығына ықпал етеді.
Сараптамалық пікірталасқа Қазцинк және «Declare Group» ЖШС мамандары қатысты. Олар жұмыста жаңа терминологияны қолдануды талқылады, пікір алмасты және стандарттардың жекелеген ережелері бойынша ұсыныстар енгізді.
Кездесу қорытындысы бойынша қатысушылар жаңа құжаттардың талаптарымен толығырақ танысып, оларды практикада қолдану кезінде туындауы мүмкін мәселелерді талқылай алды.