19 Тамыз 2026
Қазақстан ет саласына арналған халықаралық стандарттарды әзірлеуге белсенді қатысуға ниетті. Негізгі бастамалардың бірі жылқы етінен жасалған дайын өнімдерге арналған алғашқы ISO стандартын дайындау болады. Бұл мәселелер 19 тамызда Астанада өткен ет өнімдерінің сапасы жөніндегі Форумда талқыланды.
Іс-шараны ҚР Сауда және интеграция министрлігінің Техникалық реттеу және метрология Комитеті мен «ҚазСтандарт» РМК ұйымдастырды. Ол ISO/TC 34/SC 6 «Ет, құс еті, балық, жұмыртқа және олардан жасалған өнімдер» пленарлық отырысының шеңберінде өтті.
Форум ISO, мемлекеттік органдар, бизнес, ғылыми ұйымдар өкілдері мен салалық сарапшыларды біріктірді.
Басты тақырыптардың бірі Қазақстанның Халықаралық стандарттау ұйымындағы рөлін кеңейту болды. Биылғы жылы ел ISO Кеңесіне сайлауға қатысады және халықаралық техникалық комитеттердегі ұлттық сарапшылардың санын көбейтуге ниетті.
— Біз ISO Кеңесіне сайлауға қатысуды Қазақстанның Халықаралық стандарттау ұйымының қызметі мен шешім қабылдау процестеріне неғұрлым белсенді қатысу жолындағы маңызды қадам деп қарастырамыз. Алдағы уақытта отандық экономика үшін қызығушылық тудыратын бастамаларды ілгерілетіп, ұлттық сарапшылардың техникалық комитеттерге қатысуын кеңейтетін боламыз, - деді ҚР СИМ ТРМК төрағасының орынбасары Қанат Қабылбеков.
Елдің бейінді кіші комитеттегі жұмысын ҚазСтандарт үйлестіреді. Кәсіпорын халықаралық құжаттардың жобаларын сүйемелдейді, отырыстар мен дауыс беруді ұйымдастыруға қатысады, жұмыс топтарының басшыларымен өзара іс-қимыл жасайды және сарапшыларды тартады.
ҚазСтандарттың бас директоры Мәлік Сәулебайдың айтуынша, ISO/TC 34/SC 6 шеңберінде Қазақстан мен Қытайдың ынтымақтастығы жаңа деңгейге көтерілді. Тараптар стандарттау жөніндегі ұлттық органдар мен салалық мамандар арасында өзара іс-қимылды жолға қойды.
Қазақстан екі елдің кіші комитетте бірлесіп төрағылық ету мүмкіндігі туралы консультацияларды бастауды ұсынды. Ынтымақтастықтың басқа бағыттары арасында бірлескен зерттеулер мен зертханааралық салғастырулар жүргізу, сынақ әдістерін жетілдіру, мамандармен алмасу және жаңа халықаралық стандарттарды дайындау бар.
— Қазақстан үшін дайын халықаралық құжаттарды қолданудан елдің ұлттық білімін, өндірістік тәжірибесі мен экспорттық мүдделерін ескеретін стандарттарды әзірлеуге тікелей қатысуға көшу маңызды,— деп РМК басшысы атап өтті.
Қатысушылар жылқы етінен жасалған дайын өнімдерге арналған алғашқы ISO стандартын әзірлеу бастамасына ерекше назар аударды. Қазір тауарлардың осы санатына қойылатын талаптары бар бірыңғай құжат жоқ. Елдер терминологияға, жіктеуге, таңбалауға және сапаны бағалауға әртүрлі тәсілдерді қолданады. Бұл сынақ нәтижелерін өзара тануды қиындатады және экспортқа кедергілер тудырады.
Болашақ құжатты ГОСТ 34921-2023 «Жылқы етінен жасалған ұлттық өнімдер. Техникалық шарттар» негізінде әзірлеу ұсынылады.
Жаңа стандарт қазы, шұжық, жал, жая, ысталған және шұжық өнімдерін қамтуы мүмкін. Ол шикізатқа, сапа мен қауіпсіздікке, сынақ әдістеріне, таңбалауға, буып-түюге, сақтауға, тасымалдауға және бақылап тексеруге қойылатын жалпы талаптарды белгілейді.
Қазақстан құжаттың жобасын дайындайтын және оны өндіруші елдермен талқылайтын халықаралық жұмыс тобын құруға және басқаруға дайын.
Сонымен қатар Қазақстан мен Қытай салқындатылған және термиялық өңделген сиыр еті мен сиыр етінен жасалған қосалқы өнімдердің экспортына қойылатын талаптарды келісуді жалғастыруда.
Ынтымақтастықтың практикалық нәтижелерінің бірі Өскемен қааласындағы Республикалық ветеринариялық зертхана филиалының базасында көпсалалы зертхана құру болды. Бұл екі елдің талаптарын ескере отырып, өнімді зерттеуге мүмкіндік береді.
Форум аясында дайын ет өнімдерінің көрмесі де өтті. Отандық кәсіпорындар өз тауарларын халықаралық сарапшылар мен әлеуетті серіктестерге ұсынды.
Екі күндік жұмыстың қорытындысы бойынша қатысушылар ынтымақтастықтың алдағы бағыттарын анықтады. Олардың қатарында жылқы етінен жасалған өнімдерге ISO стандартын дайындау, бірлескен зерттеулер мен зертханааралық салғастырулар, сынақ әдістерін жетілдіру және зертханалық базаны дамыту бар.
Тараптар сондай-ақ стандарттарды әзірлеуге отандық бизнесті белсендірек тартуға және халықаралық сараптамалық топтарды құруға уағдаласты.
