12 Қазан 2026
Қазақстан SMIIC Метрология жөніндегі кеңесінің 18-отырысында метрология саласындағы соңғы жетістіктерін таныстырды. Жиын 5–6 қазанда Абу-Дабиде өтті. Оған қатысушы елдер мен халықаралық ұйымдардың өкілдері саланы дамыту және бірлескен жобаларды іске асыру мәселелерін талқылады.
Қатысушылар Кеңестің 2024–2026 жылдарға арналған жұмыс жоспарының орындалу барысын және салалық жұмыс топтарының қызметін қарастырды. Қазақстанды қоса алғанда, елдер делегациялары метрология саласындағы ұлттық тәжірибелерімен бөлісіп, кәсіби ынтымақтастықты одан әрі дамыту жолдарын талқылады.
Негізгі назар зертханалар арасындағы салыстырып тексерулерге және зертханалардың құзыреттілігін бағалау бағдарламаларына аударылды. Сонымен қатар сапа менеджменті жүйелерін жетілдіру, ғылыми зерттеулер мен әзірлемелерді дамыту, елдердің техникалық әлеуетін нығайту мәселелері қаралды.
Кеңес температураны өлшеу саласындағы зертханалардың құзыреттілігін бағалау бағдарламасын іске асыруға 10 мың АҚШ долларын бөлуді қолдады. Сондай-ақ қатысушылар Түркияның Ұлттық метрология институтының (TÜBİTAK UME) жетекшілігімен масса өлшемдері бойынша зертханааралық салыстыру жұмыстарын жалғастыруды қолдады.
Бұдан бөлек, Кеңес Өзбекстанның Ұлттық метрология институты ұсынған жобаны келісім берді. Жоба медициналық өлшеу құралдарын метрологиялық бақылаудың ғылыми және ұйымдастырушылық негіздерін дамытуға бағытталған.
Отырыста GULFMET және AFRIMETS өңірлік метрологиялық ұйымдарының қызметі де қаралды. Сонымен қатар SMIIC пен AFRIMETS арасында өзара түсіністік туралы меморандумға қол қойылғаны атап өтілді. Құжат ұйымдар арасындағы ынтымақтастықты дамытуға бағытталған.
SMIIC жұмысына қатысу Қазақстанға кәсіби тәжірибе алмасуға, сондай-ақ Ислам ынтымақтастығы ұйымына мүше мемлекеттермен стандарттау және метрология салаларындағы байланыстарды нығайтуға мүмкіндік береді.
Кеңестің 19-отырысын 2027 жылдың екінші тоқсанында Түркияда өткізу туралы шешім қабылданды. Алайда 2026 жылғы 31 желтоқсанға дейін басқа ел отырысты өткізуге өтінім білдірсе, оның өтетін орны өзгеруі мүмкін.