3 Маусым 2025
«ҚазСтандарт» РМК дәнекерлеуді қолданбай болат құбырларды жалғастырудың инновациялық технологиясына арналған ҚР СТ 4008-2025 стандартын әзірледі. Құжат ҚР СИМ Техникалық реттеу және метрология комитетінің бұйрығымен бекітілген және 2025 жылғы 15 маусымнан бастап күшіне енеді. Жаңа стандарт құбырлардың құрылысын сапалы жаңа деңгейге шығаруға арналған.
Құбырларды салу – мұнай-газ жобаларының капиталды көп қажет ететін құрамдас бөліктерінің бірі. Шығындардың едәуір бөлігі тек жоғары еңбек шығындарын ғана емес, сонымен қатар қауіпсіздік пен сапаның қатаң талаптарын сақтауды талап ететін дәнекерлеу жұмыстарынан тұрады.
Интерференциялық механикалық қосылыс (ИМҚ) түбегейлі өзгеше тәсілді ұсынады: құбырлар «конус — кең ернеу» технологиясы бойынша нығыздау әдісімен дәнекерлеусіз қосылады.
Бұл технологияның түйінді артықшылықтарының бірі – құрастыру жылдамдығының жоғарылығы: бір қосып жалғауға 4-5 минут жұмсалады. Бұл тәулігіне 5 шақырымға дейін құбыр салуға мүмкіндік береді. Бұл ретте қосылыстың сапасы дәнекерленген қосылыс сапасынан кем түспейді: жасалған түйіспе құбырдың есептелген минималды аққыштық шегінен мықты.
Жалғастырар алдында құбырлардың қырларына эпоксидті герметик жағылады. Ол беріктікті қамтамасыз етпейді, бірақ толық герметикалықты қамтамасыз етеді және түйіспе ішінде жемірілуге төзімді орта жасайды. Бұл әсіресе ішкі жемірілуге қарсы жабыны бар құбырларды пайдалану кезінде өте маңызды.
Технология сыртқы жүктемелерге, иілуге және температураның өзгеруіне төзімді, бұл оны Қазақстанның климаттық жағдайлары үшін ерекше өзекті етеді.
Интерференциялық механикалық қосылыс көп персоналды қажет етпейді және оны кез келген ауа-райы жағдайында қолдануға болады, бұл ұтқырлықты едәуір арттырады және құрылыс кезінде шығындарды азайтады. Жабдық кешеніне жылжымалы гидромеханикалық пресс және дизель жетегі бар жоғары қысымды май станциясы кіреді.
— Жаңа технология сала алдында кең перспективалар ашады. Стандартты енгізу инфрақұрылымдық жобаларды жаңғыртуға, көмірсутектерді тасымалдау саласындағы өнімділікті арттыруға және тұрақты дамуға жағдай жасайды, — деп атап өтті ҚазСтандарт.