11 Шілде 2025
10 және 11 шілдеде Санкт-Петербургте «Д.И. Менделеев атындағы БМҒЗИ» ФМУК базасында Еуро-Азия өңірі елдерінің ұлттық метрологиялық институттарының диалогы мен ынтымақтастығы үшін негізгі платформалардың бірі — КООМЕТ сапа форумының 29-шы отырысы өтіп жатыр. Іс-шараға жеті мемлекеттің: бетпе-бет — Ресей, Беларусь, Өзбекстан, Қырғызстан және Тәжікстан, онлайн-форматта — Әзірбайжан және Куба өкілдері қатысуда.
КООМЕТ (Еуро-Азия мемлекеттік метрологиялық мекемелердің ынтымақтастығы) бүгінгі таңда 17 мемлекетті біріктіреді. КООМЕТ мүшелері мына елдердің: Әзірбайжан, Армения, Беларусь, Болгария, Босния және Герцеговина, Германия, Грузия, Қазақстан, Қытай, Қырғызстан, Куба, Молдова, Ресей, Словакия, Тәжікстан, Түркия және Өзбекстан метрологиялық мекемелері болып табылады. Қазақстан 1998 жылдың қарашасында ұйымның толық құқықты қатысушысы болды. КООМЕТ-ке қатысу метрология саласындағы халықаралық ынтымақтастыққа және калибрлеу мен өлшеу нәтижелерін халықаралық деңгейде тануға жол ашады.
КООМЕТ сапа форумы Еуро-Азия мемлекеттік метрологиялық мекемелердің ынтымақтастығы шеңберінде жұмыс істейді және ұлттық сапа менеджменті жүйелерін тануды қамтамасыз етуде маңызды рөл атқарады. Оның негізгі міндеті — ұлттық эталондар мен калибрлеу және өлшем сертификаттарын өзара тану туралы MRA келісімінің шарттарын орындауға көмектесу.
Отырыстың басты тақырыбы ұлттық метрологиялық институттардың ISO/IEC 17025:2017 «Сынау және калибрлеу зертханаларының құзыреттілігіне қойылатын жалпы талаптар» және ISO 17034:2016 «Стандартты үлгілерді дайындаушылардың құзыреттілігіне қойылатын жалпы талаптар» сияқты халықаралық стандарттар талаптарына сәйкестігін талқылау болды. Бұл өлшемшарттар КООМЕТ сарапшылары жүргізетін сапа менеджменті жүйелерін бағалаудың негізіне жатады.
Қазақстан Ұлттық метрологиялық институтының сапа менеджменті жүйесін ұсынған «ҚазСтандарт» РМК презентациясы форумға қатысушылардың назарын аударды. Баяндама мақсаты 2026 жылдың бірінші тоқсанына жоспарланған КООМЕТ аудиторлары тарапынан жүйені сыртқы бағалауға рұқсат алу болып табылады.
ҚазСтандарт баяндамасы барлық қатысушылар тарапынан қолдауын алады, бұл қазақстандық метрологиялық жүйеге деген сенім деңгейінің маңызды дәлелі болды.
Сапа менеджменті жүйесін тану қазақстандық зертханаларға сыртқы нарықтарда жұмыс істеуге, халықаралық жобаларға қатысуға, ал отандық өндірушілерге — өнім экспортын жеңілдетуге мүмкіндік беретінін атап өтеміз.
КООМЕТ шеңберіндегі ынтымақтастық Қазақстан мен басқа да қатысушы елдер үшін стратегиялық рөл атқарады, өйткені ұлттық эталондар мен өлшемдерді халықаралық тануға ықпал етеді. Сонымен қатар мұндай платформаларға қатысу калибрлеу мүмкіндіктерін кеңейтуге, саудадағы техникалық кедергілерді жоюға және тұрақты экономикалық өсуді қолдауға ықпал етеді.
