26 Маусым 2025
Онлайн форматта ҚР СТ ISO 21902-2024 «Туристік қызметтер. Жүріп-тұруы шектеулі топтардың қажеттілігін ескере отырып, халық үшін қолжетімді туризм. Жалпы талаптар» жаңа ұлттық стандартын талқылауға арналған дөңгелек үстел өтті.
Іс-шараның бастамашысы ҚазСтандарт болды. Диалогқа мемлекеттік органдардың, туристік бизнестің өкілдері, сондай-ақ тұрақты даму және инклюзия саласындағы сарапшылар қосылды.
Кездесудің мақсаты — қатысушыларды Қазақстанға инклюзивті туристік ортаны қалыптастырудың жүйелі тәсілін алғаш рет ұсынатын жаңа стандарттың негізгі ережелерімен таныстыру. Құжат туристік қызметтердің барлық спектрін — қонақ үйге орналастыру мен тасымалдаудан бастап, көрсету нысандарындағы цифрлық платформалар мен сервистерге дейін қамтиды.
Талқылаудың басты бағыты ISO 21902 стандартының негізінде жатқан халықаралық тәжірибелер және олардың қазақстандық шындыққа бейімделуі болды. Қатысушылар жүріп-тұруы шектеулі жандарға, аға буынға және балалары бар ата-аналарға жайлы жағдай жасау тәжірибесімен бөлісті. Сондай-ақ, мемлекет, бизнес және қоғамдық ұйымдар арасындағы ынтымақтастық тетіктері — нормативтік құжаттар деңгейінде де, нақты кейстер бөлігінде де талқыланды.
Әмбебап дизайнға - өнiмдер, көрсетілетін қызметтер мен кеңiстiктер мүмкiндiгiнше көпшілік адамдар үшiн ыңғайлы және қауiпсiз, қосымша бейiмделудiң қажетiнсiз жасалатын тәсiлге ерекше көңiл бөлiндi.
ҚР СТ ISO 21902-2024 осы жылдың 1 шілдесінде күшіне енді. Оны енгізу инклюзивті қоғам жолындағы маңызды қадам болды, онда әркімнің саяхатқа, тәжірибеге және елдің мәдени құндылықтарына қол жеткізуге тең құқығы бар.