4 Сәуір 2026
Қазақстан алғаш рет отандық халал сертификатымен Сауд Арабиясына өнім экспорттады. Құжатты КазСтандарт беріп, ол корольдік деңгейде танылды.
Бұл елдегі халал сертификаттау жүйесі үшін маңызды қадам болып, экспортты дамытуға жаңа мүмкіндіктер ашты.
Қазіргі таңда КазСтандарт Saudi Food and Drug Authority жанындағы Saudi Halal Center-де аккредиттелген Қазақстандағы жалғыз ұлттық орган болып отыр. Аталған құрылымдар Сауд Арабиясы нарығына өнімнің кіруіне жауап береді және оның шариғат талаптары мен халықаралық стандарттарға сәйкестігін растайды.
Мұндай танусыз корольдікке халал өнім экспорттау мүмкін емес. Енді Қазақстан сертификаттары ресми түрде қабылданатын елдердің қатарына қосылды.
Өнімді сыртқы нарықтарға ілгерілетуге Қазақстанның агроөндірушілері мен экспорттаушылары қауымдастығы қолдау көрсетіп отыр. Ол халықаралық байланыстарды дамытып, БАӘ, Сауд Арабиясы және Өзбекстандағы сауда өкілдіктері арқылы жұмыс жүргізеді.
Сауд Арабиясы халал өнімдерге қойылатын талаптары жоғары нарықтардың бірі саналады және Парсы шығанағы елдеріне шығуға жол ашады.
Бұл нарыққа шығу қазақстандық компанияларға бірқатар артықшылық береді. Атап айтқанда, жеткізу географиясын кеңейтуге, шетелдік серіктестердің сенімін арттыруға және елдің халал өнім жеткізуші ретіндегі позициясын нығайтуға мүмкіндік береді.
КазСтандартта бұл нәтижеге мемлекет, салалық институттар мен бизнес өкілдерінің жүйелі жұмысы арқылы қол жеткізілгенін атап өтті.